Në një letër të fundit drejtuar nipit të tij, Valjet, akademiku Rexhep Qosja ka lënë udhëzime të qarta për mënyrën e varrimit, duke kërkuar thjeshtësi dhe mungesë ceremonish fetare apo zyrtare. Ai shpreh dëshirën që ceremonia të bëhet vetëm nga familjarët, pa fjalime, pa media dhe pa lule, duke theksuar jetën e tij të përkushtuar ndaj mendimit shkencor, lirisë dhe thjeshtësisë.
Në tekstin e tij, Qosja reflekton edhe mbi jetën dhe veprën e vet, duke pohuar se i ka shërbyer lirisë, bashkimit dhe mirëqenies së popullit shqiptar. Ai pranon se nuk e konsideron veten pa të meta, por shpreh bindjen se ka jetuar dhe vepruar me qëllime të mira, duke e përmbyllur testamentin me fjalët se “vdes i qetë”, në paqe me jetën dhe veprën e tij.
