Një kamion cisternë që transportonte vaj kanola është përfshirë nga zjarri të premten në mëngjes në autostradën A8 pranë Aichelbergut, në distriktin Göppingen të Gjermanisë.
Sipas policisë, fillimisht një gomë e përparme e kamionit është përfshirë nga flakët, të cilat më pas janë përhapur në kabinë, duke e shkatërruar plotësisht atë. Shoferi 39-vjeçar ka arritur të dalë në kohë dhe nuk ka pësuar lëndime.
Autoritetet kanë bërë të ditur se rezervuari me vaj kanola nuk është prekur nga zjarri.
Zjarrfikësit kanë ndërhyrë menjëherë dhe kanë shuar flakët brenda rreth një ore. Si pasojë e incidentit, autostrada është mbyllur përkohësisht në të dy drejtimet, duke shkaktuar kolona të gjata dhe bllokime trafiku.
Më vonë, qarkullimi në drejtim të Mynihut është rihapur pjesërisht, ndërsa një korsi ka mbetur e mbyllur për disa orë deri në përfundim të kontrolleve dhe pastrimit të rrugës.
